Lengkong Panyerutan nu piwaaseun keur simkuring
Harita kuring borojol di ieu lembur
Najan aya di kota tapi wargana daek gotong royong siga di desa
6 taun lilana, tapi kacangreud dina ati
Moal bisa leungit ku muterna waktu
Lengkong Panyerutan nu jadi Lengkong Barat
Sisieun walungan Ciloseh
Kidulna aya Statsion
Lengkong nu katelah padetna
Loba gang sempit sameteran
pasambung sambung ngajadikeun pirumiteun
nu karek apal mah pasti sasab
mun keur pere geus THB
sok maen langlayangan
pangleutikna ge ukuran sameteran
nu leutik mah tara dipake
Ka Statsion salain ningali kareta
sok ngagelengkeun duit jadi gepengan
kadang paku jeung pepesoan
kadang ngaheureuyan bule di kareta argo
Beurangna sok aya latihan bokser
pus ap sit ap nurut palatih
neunggeul jeung najong karung keusik
lumpat mah unggal waktu di lapang tenis
Beca pabalatak sok dipake kaulinan
biasan nu teu digembok sok ditaekan
baruda aajrutan duna beca
nepi nu boga beca datang jeung nyarekan
teu matak kapok malah diulang isukna deui
Basa bulan puasa, di lembur sabeulah
Kalangsari nu jadi saksi
Nabeuhan dulag teu eureun eureun
Pupujian kitu deui
matak rame puasa teh
Taraweh sok pangramena
pasered sered nu keur taraweh nepi ka labuhna
kadang sok morosotkeun sarung batur
komo mun keur ruku mah sok dicolok bujurna
Ai di lengkong mah rame ku merecon
pepetasan jeung kembang api patembal tembal
rame pisan euweuh bandingna
Ningali caahna ciloseh
ngabentur batu nu gede
ditambah hujan nu ngagebret
matak hate nyeredet
Katingali aya makam batara belah kulon
nu pinuh ku tangkal kamoja
belah kencana aya makam Gunung Dalem
nu dihieuman ku tangkal awi
Lengkong geus robah pisan
loba wangunan jeung gedong anyar
matak beuki sempit taneuh teh
leuwih heurin batan jakarta
Tidak ada komentar:
Posting Komentar